Sede Xudicial Electrónica

Sede Xudicial Electrónica

Execución de título xudicial (civil ou social)

Procedemento dirixido a esixir o cumprimento do disposto nunha sentenza, auto ou decreto firmes que puxesen fin a un procedemento anterior.
Tramitar en liña

    Que é

    É un procedemento mediante o cal unha persoa pode solicitar ao xulgado que faga cumprir o que se establece nunha sentenza, auto ou decreto firmes que puxesen fin a un procedemento anterior cando a persoa condenada non o faga voluntariamente.

    Para que serve

    Este procedemento serve para executar títulos xudiciais da orde civil, sen necesidade da intervención de avogado/a e procurador/a, segundo o disposto no artigo 539.1 da Lei de Axuizamento Civil (LAC).

    Tamén se poden executar por esta vía as resolucións recaídas en procedementos da orde social mediante a presentación de escrito da persoa interesada sen necesidade da intervención de avogado/a nin de procurador/a, conforme o dispón o artigo 237 da Lei 36/2011, do 10 de outubro, reguladora da xurisdición social.

    Documentación que se debe presentar

    Nos casos nos que se solicite a execución dunha resolución da/o Letrado/a da Administración de Xustiza (LAX)  ou dunha sentenza ou resolución ditada polo tribunal competente para coñecer da execución, deberase acompañar á demanda a seguinte documentación conforme o establece o art. 549.2 LAC:

    • Identificación da sentenza ou resolución: A demanda debe identificar claramente a sentenza ou resolución cuxa execución se solicita.
    • Documentos adicionais: Pódense anexar todos aqueles documentos que a persoa executante considere convenientes e que conteñan datos de interese para o desenvolvemento da execución.

    Cal é o seu custo

    Taxas:

    As persoas físicas están exentas do pagamento de taxas xudiciais.

    Como solicitalo

    A presentación da solicitude poderá realizarse por calquera medio, xa sexa en forma presencial ou a través da Sede Xudicial Electrónica de Galicia. Para poder presentar a demanda de execución deben transcorrer 20 días desde a firmeza da resolución cuxa execución se solicita, segundo establece o artigo 548 da LAC.

    A presentación da solicitude levarase a cabo no Servizo Común de Rexistro e Repartición ao que estea adscrito o órgano que ditou a resolución cuxa execución se solicita ou no propio órgano no caso de ser único.Tamén hay que ter en conta que non deben transcorrer 5 anos desde a firmeza da resolución, posto que este é o prazo de caducidade previsto para esta clase de accións.

    Así mesmo, poderase presentar na Sede Xudicial electrónica, os escritos iniciadores dos procedementos de execución derivados de procesos declarativos nos que non sexa necesaria a representación letrada (procedementos monitorios e verbais cuxa contía non exceda de 2.000 €).

    Pode atopar a localización e datos das Oficinas de Rexistro e Repartición e servizos comúns no Directorio Xudicial Directorio Xudicial.

    Normativa

    Lei 1/2000, do 7 de xaneiro, de Axuizamento Civil (arts. 538 e ss.).

    Lei 36/2011, do 10 de outubro, reguladora da Xurisdición Social (arts. 237 e ss.).

    Formas de presentación

    Tramitar en liña (Necesario certificado dixital ou DNI electrónico)

    Preguntas frecuentes

    Que é a execución de título xudicial?

    É un procedemento mediante o cal unha persoa pode solicitar ao xulgado que faga cumprir o que se establece nunha sentenza, auto ou decreto firmes que puxesen fin a un procedemento anterior cando a persoa condenada non o faga voluntariamente.

    Quen pode presentar unha demanda de execución?

    A execución dunha sentenza poderá ser solicitada por aquela persoa a quen lle resulte favorable, presentando ante o xulgado un escrito de demanda.​​​

    Necesito de avogado/a ou procurador/a?

    En materia civil non será necesaria a asistencia de avogado/a ou procurador/a cando a cantidade total pola que se solicite a execución non sexa superior a 2.000 €.

    Na orde social non será necesaria a asistencia de avogado/a ou procurador/a sen limitación en función da contía.

    Cando podo interpoñer a demanda de execución?

    Unha vez que transcorresen 20 días desde a notificación da sentenza á persoa condenada ao pagamento e antes de que pase o prazo de caducidade de 5 anos desde a firmeza da sentenza.

    Como se pode reclamar?

    Mediante un escrito dirixido ao xulgado no que conste a seguinte información:

    • Os datos identificativos das partes (nome, apelidos, domicilio).
    • Xulgado que ditou a sentenza e o número e ano do procedemento no que se fixo.
    • A solicitude de que se despache execución para o cumprimento desa resolución.
    • A cantidade que se reclama. Esta cantidade incluirá o principal da débeda e os xuros vencidos. Poderase engadir outra cantidade calculada de maneira provisional para os xuros e custas que se produzan durante a execución. Esta última cantidade non poderá superar, salvo xustificación, o 30% do principal.
    • Os bens da persoa debedora que se coñezan que sexan susceptibles de ser embargados e se se consideran suficientes para cubrir as cantidades reclamadas. No caso de non coñecer bens, pódese solicitar ao xulgado que os pescude solicitando información a entidades financeiras, organismos públicos ou outras persoas.

    Débese abonar a taxa para o exercicio da potestade xurisdicional?

    As persoas físicas están exentas do pagamento de taxas xudiciais (art. 4 da Lei 10/2012 modificado pola Real Decreto-Lei 1/2015 do 27 de febreiro).

    As persoas xurídicas deberán acompañar o modelo 696 co xustificante de pagamento do mesmo para opoñerse á execución. Poden encher e, no seu caso, presentar e imprimir devandito modelo a través do portal da Axencia Estatal da Administración Tributaria na internet, dispoñible en https://sede.agenciatributaria.gob.es.

    Ante que órgano debe presentarse a demanda?

    A demanda de execución débese presentar no Servizo Común de Rexistro e Repartición ao que estea adscrito o órgano que ditou a resolución cuxa execución se solicita ou no propio órgano no caso de ser único.

    Tamén se poderá presentar a través da Sede Xudicial Electrónica no caso de que esta funcionalidade estivese operativa.

    Cales son os trámites do procedemento de execución?

    O xulgado examinará a demanda presentada e, de cumprirse os requisitos legalmente establecidos, ditará unha resolución despachando a execución solicitada, na que acordará o embargo dos bens da persoa debedora (executado/a) para cubrir as cantidades reclamadas e/ou, no seu caso, a investigación dos seus bens.

    Se é necesario, requirirase á persoa debedora/a para que designe bens. Contra a resolución que dite o xulgado acordando a execución, o executado/a poderá opoñerse alegando a caducidade (se transcorreropn máis de cinco anos desde a firmeza da sentenza sen que se interpuxera a correspondente demanda de execución), o pagamento ou cumprimento do ordenado na sentenza, ou os pactos ou tratos aos que chegasen as partes para evitar a execución, sempre que o acordado conste en documento público.

    Non atopas o que buscas?

    NexGenerationEU
    Plan de Recuperación, Transformación y Resilencia
    Xunta de Galicia
    Información mantida e publicada en internet pola Xunta de Galicia, 2026
    - -